Fossar ráðgjafi SKEL og Orkunnar um kaup á meirihluta í Samkaupum
Í framhaldi af fyrri viðræðum SKEL fjárfestingafélags og Samkaupa um sameiningu Samkaupa við Orkuna og Atlögu ehf. (áður Heimkaup), hefur nú verið undirritaður kaupsamningur milli Orkunnar sem kaupanda og KSK sem seljanda um alla hluti seljanda í Samkaupum. Um er að ræða 51,3% eignarhlut í Samkaupum.
Kaupverð hlutanna er samtals 2.878 m.kr. og miðar við að verðmæti hlutabréfa Samkaupa í heild sinni (e. equity value) sé 5.610 m.kr. Kaupverðið verður greitt með afhendingu á nýju hlutafé í Orkunni. Þá á Orkan jafnframt um 81% hlut í Lyfjavali.
Viðskiptin eru háð ýmsum skilyrðum, m.a. að fyrir liggi áskrift að nýju hlutafé í Orkunni að verðmæti 2.000 m.kr. sem skal nýtt til að efla fjárhagsstöðu Samkaupa, og að Orkan hafi komist að skuldbindandi samkomulagi við aðra hluthafa í Samkaupum um kaup á eignarhlut þeirra í félaginu þannig að samanlagður eignarhlutur Orkunnar og annarra aðila tengdum SKEL nemi að lágmarki 90,01% í kjölfar viðskipta. Þá er lagt upp með að klára sameiningu Samkaupa og Atlögu samhliða ofangreindum viðskiptum.
Eftir uppgjör viðskiptanna og fyrirhugaða hlutafjáraukningu verður hlutur SKEL í móðurfélagi samstæðunnar um 63%. Samningur aðila gerir ráð fyrir að samstæða félaganna verði mynduð með sambærilegu sniði og skráð smásölufyrirtæki hérlendis. Samstæðan mun í upphafi starfa á sviði matvöru, orku, bílaþvottar og lyfsölu og verða sviðin rekin á samstæðugrunni.
Fyrirtækjaráðgjöf Fossa er ráðgjafi SKEL fjárfestingafélags.
Tengdar fréttir
