Fossar verða fjárfestingarbanki
Fossar markaðir hafa fengið starfsleyfi sem fjárfestingarbanki frá fjármálaeftirliti Seðlabanka Íslands og heita nú Fossar fjárfestingarbanki hf.
Haraldur Þórðarson, forstjóri Fossa fjárfestingarbanka:
„Um er að ræða afskaplega ánægjulegan áfanga í sögu Fossa sem felur í sér fjölgun tækifæra til að þjónusta viðskiptavini okkar og jafnframt aukin umsvif á fjármálamarkaði. Með nýju starfsleyfi getum við boðið viðskiptavinum upp á víðtækari þjónustu en áður meðal annars með auknum heimildum til útlána og aukinni getu til framvirkra viðskipta með verðbréf og gjaldeyri. Þá opnar starfsleyfið á möguleika Fossa til að starfrækja viðskiptavakt með skráða fjármálagerninga, þar á meðal með ríkisskuldabréf. Við leggjum enn fremur mikla áherslu á áframhaldandi uppbyggingu eignastýringar og fjárfestingaráðgjafar þar sem alþjóðlegt vöruframboð okkar er í sérflokki.”
Fossar fjárfestingarbanki mun áfram kappkosta við að veita viðskiptavinum framúrskarandi þjónustu með áherslu á markaðsviðskipti, fyrirtækjaráðgjöf og eignastýringu. Starfsfólk Fossa hlakkar til áframhaldandi samstarfs með viðskiptavinum undir nýjum formerkjum.
Um Fossa fjárfestingarbanka
Fossar voru stofnaðir árið 2015 og þjónusta innlenda og erlenda fjárfesta á sviði markaðsviðskipta, fyrirtækjaráðgjafar og eignastýringar. Starfsmenn Fossa eru reyndir sérfræðingar með viðamikla þekkingu á bæði innlendum og erlendum fjármálamörkuðum. Markmið Fossa er að skila viðskiptavinum árangri með því að veita framúrskarandi fjármálaþjónustu. Enn fremur leggja Fossar mikið upp úr því að vera í fararbroddi íslenskra fyrirtækja í samfélagslegri ábyrgð og sjálfbærni, bæði í eigin starfsemi og í gegnum víðtæk áhrif starfseminnar á viðskiptavini og aðra haghafa. Þannig hafa Fossar til dæmis verið brautryðjandi í umsjón með útgáfu grænna skuldabréfa á Íslandi.
Tengdar fréttir
